பாரதி இன்று இருந்தால்

 

கல் தோன்றி மண் தோன்றாக் காலத்தே முன்தோன்றிய
தமிழ்க் குடியின் மணிமகுடமே..
பைந்தமிழ்த் தேர்ப்பாகனே.. பாரதியே..
இன்று நீ இருந்தால்...

கல்பனா சாவ்லாவையும் கிரண் பேடியையும் கண்டு பிரமித்துப் போவாயா..

அல்லது..

'ஆதிக்கம்' செய்யும் ஆண் வர்க்கத்தின் அடிமைச் சின்னங்களாய்..

காவியம் படைக்காமலே காணாமல் போன

நம் கண்ணம்மாவையும் செல்லம்மாவையும்

பார்த்துப் பரிதவித்துப் போவாயோ.. தெரியவில்லை!

ஐந்து வயதில் ஐம்பது புத்தகங்களும்
ஈரைந்து வயதில் இணையதளமும் என்று
சாதனை படைக்கும் நம் பாரதச் சிறுவர்களைக் கண்டு களிப்பாயா..
அல்லது..
கரன்சிகளுக்குள்ளே காணாமல் போன 'கல்விக் கலை'யை
கனவிலேயே கற்றுக் கொள்ளும்
ஏழை 'ஏகலைவன்'களை எண்ணிக் கொதிப்பாயோ.. தெரியவில்லை!

ஆழிப்பேரலையால் அடித்துச் செல்லப்பட்ட 'மனித சாதி'க்கு

அன்பாலே அருமருந்திட்ட அன்னை உள்ளங்களை எண்ணி ஆனந்தம் கொள்வாயா..

அல்லது..

ஆயிரம் சாதிக்கொடிகள் உயரே பறக்க

தன் உடலை மறைத்துக் கொள்ள ஓர் ஒற்றைத் துணிக்கு ஏங்கித் தவிக்கும்

ஏழையைப் பார்த்து ஏமாற்றம் கொள்வாயோ தெரியவில்லை!

தாய்நாட்டைப் பழித்தவனைத் தாய் தடுத்தாலும் விடாத
நம் வீர இளைஞர்களைக் கண்டு வீறுகொள்வாயா..
அல்லது..
தாய்நாட்டில் தரித்த அறிவுக் குழந்தையை
அயல் நாட்டில் பிரசவித்து ஆதாயம் தேடும்
நம் 'கற்ற' இளைஞர்களை எண்ணிக் கவலை கொள்வாயோ.. தெரியவில்லை!

என்னவாயினும்.. எதுவாயினும்..

பாரதியே.. இன்று நீ இருந்தால்..

பாரதியே.. இன்று மட்டும் நீ இருந்தால்..

பல கனவுகள் நனவாகி இருக்கும்;

சில தீய நிகழ்வுகள்

நடவாமலே நாடகமாகப் போயிருக்கும்....!!

 பி.கு.: மகாகவி பாரதியின் பிறந்ததினத்தை முன்னிட்டு இந்தக் கவிதை. கல்லூரிக் காலத்தில் எழுதப்பட்டது. ஏற்கனவே என்னுடைய “ராதையின் நெஞ்சமே” தளத்தில் வெளிவந்தது. இப்போது மீள்பதிவாக இங்கே :-)

*

*